విద్యార్థుల సంక్షేమం
రెసిడెన్షియల్ విద్యాసంస్థల్లో మౌలిక వసతులకు సంబంధించిన సమస్యలను గుర్తించి వెంటనే పరిష్కరించాలని, విద్యార్థుల ఆరోగ్యం, భద్రత విషయంలో ఎలాంటి నిర్లక్ష్యానికి తావివ్వరాదని జిల్లా కలెక్టర్ కోయ శ్రీహర్ష సంబంధిత అధికారులను ఆదేశించారు. సోమవారం పెద్దపల్లి జిల్లా సమీకృత కలెక్టరేట్ కార్యాలయంలో రెసిడెన్షియల్ విద్యాసంస్థల్లో చేపట్టాల్సిన చర్యలు, పారిశుద్ధ్యం, విద్యార్థుల భద్రత, ఆహార నాణ్యత తదితర అంశాలపై జిల్లా కలెక్టర్ కోయ శ్రీహర్ష, అదనపు కలెక్టర్ (లోకల్ బాడీస్) అరుణశ్రీతో కలిసి సమీక్ష సమావేశం నిర్వహించారు.
ఈ సందర్భంగా జిల్లా కలెక్టర్ కోయ శ్రీహర్ష మాట్లాడుతూ, రెసిడెన్షియల్ విద్యాసంస్థల్లో మౌలిక వసతులకు సంబంధించిన సమస్యలను క్షేత్రస్థాయిలో గుర్తించి, వాటిని వెంటనే పరిష్కరించాలని సూచించారు. ఎలుకలు, పాముల కాట్లు, ఆహార కలుషిత ఘటనలు వంటి సమస్యలు జిల్లాలో ఎట్టి పరిస్థితుల్లోనూ చోటుచేసుకోకుండా ముందస్తు చర్యలు చేపట్టాలని స్పష్టం చేశారు.
రెసిడెన్షియల్ విద్యాసంస్థల్లో మొదటగా పారిశుద్ధ్యంపై ప్రత్యేక దృష్టి సారించాలని సూచించారు. విద్యాసంస్థల ప్రాంగణాల్లో ఎక్కడా నీరు నిల్వ ఉండకుండా చూడాలని, కంపౌండ్ వాల్ లోపల పెరిగే పిచ్చి మొక్కలు, పొదలను క్రమం తప్పకుండా తొలగించాలని ఆదేశించారు.
ఈ సమావేశంలో డీఈవో శారద, సంబంధిత శాఖల అధికారులు, రెసిడెన్షియల్ విద్యాసంస్థల అధికారులు, ఎంపీడీవోలు, మున్సిపల్ అధికారులు, మిషన్ భగీరథ, పంచాయతీరాజ్ ఇంజినీరింగ్ తదితర శాఖల అధికారులు, తదితరులు పాల్గొన్నారు.
