జిల్లాలో విషాదకర ఘటన చోటుచేసుకుంది. స్థానిక సంస్థల ఎన్నికల్లో జనసేన పార్టీ తరఫున ఎంపీటీసీ అభ్యర్థిగా పోటీ చేసిన గారపాటి దివ్య (23) అనారోగ్యంతో చికిత్స పొందుతూ మృతి చెందారు. ఎన్నికల పోలింగ్ పూర్తయిన తర్వాత ఆమె మృతి చెందడంతో కుటుంబ సభ్యులు, పార్టీ నాయకులు, గ్రామస్థులు తీవ్ర విషాదంలో మునిగిపోయారు.
వివరాల్లోకి వెళ్తే.. జిల్లా దేవరపల్లి మండలానికి చెందిన గారపాటి దివ్య జనసేన పార్టీ తరఫున ఎంపీటీసీ ఎన్నికల్లో పోటీ చేశారు. గురువారం పోలింగ్ పూర్తయిన అనంతరం మధ్యాహ్నం ఆమె అకస్మాత్తుగా అస్వస్థతకు గురయ్యారు. దీంతో కుటుంబ సభ్యులు వెంటనే ఆమెను చికిత్స నిమిత్తం రాజమహేంద్రవరంలోని ప్రభుత్వ ఆసుపత్రికి తరలించారు.
అక్కడ వైద్యులు చికిత్స అందించిన అనంతరం ఆమె ఆరోగ్యం కొంత మెరుగుపడటంతో గురువారం రాత్రి ఇంటికి తీసుకువచ్చారు. అయితే శుక్రవారం ఉదయం మరోసారి ఆమె అస్వస్థతకు గురయ్యారు. దీంతో కుటుంబ సభ్యులు తిరిగి రాజమహేంద్రవరం ఆసుపత్రికి తరలించారు. అక్కడ చికిత్స పొందుతూ దివ్య తుదిశ్వాస విడిచారు. ఆమె మృతితో కుటుంబ సభ్యులు కన్నీరుమున్నీరుగా విలపించారు.
దివ్యకు నాలుగు నెలల క్రితమే ఒక మగశిశువు జన్మించాడు. అంతకుముందు మరో కుమారుడు కూడా ఉన్నాడు. చిన్న వయసులోనే ఆమె మరణించడంతో ఇద్దరు చిన్నారులు తల్లిని కోల్పోయారు. ఎన్నికల్లో పోటీ చేసి ప్రజల తీర్పు కోసం ఎదురుచూస్తున్న సమయంలో ఆమె మృతి చెందడం స్థానికంగా తీవ్ర విషాదాన్ని నింపింది.
దివ్య మరణవార్త తెలుసుకున్న జనసేన పార్టీ నాయకులు, కార్యకర్తలు సంతాపం వ్యక్తం చేశారు. ఆమె కుటుంబ సభ్యులకు ప్రగాఢ సానుభూతి తెలిపారు. గ్రామంలో విషాద ఛాయలు అలుముకున్నాయి.